عزرائيل .. بين أمى وأبى ... قصيدة للمبدع الكبير الأستاذ / على جامع

أبويا ميّت من زمان
وعزرائيل ..
أمى قالت لى إنّه جالها مرّتين
وان ابويا بعت لنا معاه قرشينات
وانه متأسف قوى
اكمنه مقدرش النوبادى مع الفلوس
يبعت حاجات

***************
أبويا ميّت من زمان
وعزرائيل
أمى قالت لى انه جالها مرّه تالته
وان ابويا بعت لنا ويّاه جواب
وانه طالب منّها تقرقش له عيش
لجل يفطر كل يوم الصبح منّه
ناسى معذور انه مات
قبل تمن العيش مايغلا
واننا من بعد موته
دون عشانا ساعات نبات
*****************
مره رابعه
عزرائيل جه يسأل امى
ايه عملتى؟
أصل مخصوص النوبادى باعتنى أخد القرقوشات
أمى تبكى بنهنهات
ايه الحكايه؟
قولى ماتخبيش عليا
أمى تنطق
أصلى مكسوفه انى اقول لك
انه مات مالهوش رصيد
وانهم عايزينه ياابنى
لجل يحضر
جلسته اللى اتحددت فى المحكمه
يوم التلات .