خلينا فى امبارح...قصيدة للشاعر الكبير / على جامع

حلمت لك
وصحيت من الحلم ارتعش م البرد فاتغطيت
وحاولت اكمل حلم ماقدرتش
فياهلترى
الحلم قصر واللا انا كشيت
وياهلترى
قاعد معاكى اللى اشتريته ف حلم عمنول
وأولة أول؟
لو لسه كان قاعد
كل اللى فاضل حلم
عليا انا التكاليف
وعليكى حلم الخلفه بالأولاد
وانا بعد مانتى تخلفى
هاعمل مزاد
ناكل بدا مره
نلبس بدا مره
وبدا نداوى الوجع
هوه احنا يعنى ضمننا لما هيكبروا
هايكونوا ايه؟
ماتفكريش
ربك غفور
واللا انتى يعنى فكرك نخدعهم ونخدعنا
بمواعظ الأمل اللى بتصبرنا
لما القدر فوق النار يفور
لو تسمعى لعقلك ندا
هايقول كدا
ويا اما طابت واسترحنا
يااما لاتنين يبقوا عور
أرجوكى طاوعينى
لجلن مااحط ف بطنى سكاكينى
وامشى ف سكك بكره
بالحق على فكره
أبوكى امتى هاييجى يخطبنى
انا من زمان مشتاق اقول لأه
برغم عارف ضهرى لو جيت افرده
سلسلته هاتقول ألف أه
والقلب راح ينزف ألم
مابدهاش
راح اكلم امى ترد على ابوكى
تطلب ايديه منه
اكمنها واكمنه
متعطشين جدا
انا كنت بالمحهم
الديك اذا يدن
تطلع له فوق السطح
تسمع له يسمعها
البرد يلسعها
يتدفوا من غير نار
والأدهى تنزل لى
تزغدنى وتقول لى
قوم يابنى صلى الفجر
الفاتحه على ابويا
وياسين لروح امك
لكن ولايهمك
خلينا فى امبارح
امبارح الفينو
اللى احنا حالمينه
واللى احنا خاطفينه
من نن عين بكره
ياحبيبتى على فكره
فكرت اجيب مأذون
علشان ينام جنبى
وقتن مااكون باحلم
بطلاقى وطلاقك .