خايف
وخوفي مش منك
خايف
لخوفي يوصلك
عاشق
وقلبي مش ملكي
خلاص ولى
بقى ملكك
وفي التوهة نسيته معاكي
ما يسلاكي
وعز الشوق
وانا مخنوق
مبكيني
وسيرة عشقي بلساني
تسليني
ونبض القلب وياكي
بيرضيني
واقوله يا شوق
استنى ... ما ترميني
في بحر الحرقة
والضيقة
تعزيني
دانا محتار
مابين الشوق و مرساله
وبين الليل و مواله
وحتى القلب في بعادي
بيحلاله
يروح عندك
ينول قربك ... و أوصاله
طب أعمل إيه؟؟؟
وأنا غرقان
ومركبتي
بدون ربان
وأمواج البعاد زادت
وموجة شوق بنا هاجت
ولسه الشط متخفي
ومينا تقول لمركبتي
هنا لفي
و سيبي الحبل ع الغارب
ولما شراعي يتوارب
تعالي ارسي
وخد قلب الغريق مني
وهات قلبي .. و قول حسي
ماهو انت كمان
يا سي الربان
نسيت قلبك .. هنا جنبي
نسيت رسمي
لكن قلبي رحل وياك
وقال نفسي
لو الأرواح بتتلاقى
يكون إسمي
في أول صفحة السعدا
أو الهايمين أو الشهدا
وكل غريق من بعدي
يغني غنوتي اياها
قصيدة عشق محلاها
يقول ليلي
وأنا قصاده هنا ف سري
بأقول عيني
ودمعايتي على خدي
وقمراية ... تقول سدي
وشجرة طارحة جوايا
جناين سهد
وقلبي يدوب
هنا ف دوبك
لآخر حد
و دباديبك
تدوب ف القلب
ولما شمعي ينقادلك
ينورلك ... سراديبك
ولا يسيبك ... بدون مأوى
و لا مرسى
ولما ليلنا ده يطول
نقوله
عيد من الأول
في سيرة الحب
و لما الشط يتوارب
نروح نسكن
مع العشاق ... بلا أشواق
جزيرة الحب
.........
جابر الشوربجي