عشقت الشعر من صغري
وباكتب حر
ومش فاهم سبب حبي
وإيه السر
وباسمع عن بحوره كتير ..
لكن لسه يدوووب ع البر
ومش مضطر
اكون شاعر
ولا بينكم يكون لي سعر
باحس كلامي عشوائي
لكن رّاقي ودمه خفيف
كلام معجون ومش موزون
تحسه أي شيء ف رغيف
وباكتب عادي بالبركة
وأيه يعني ولو نكتب ..
قصيدة ما بينا مشتركة
ما رزق الكلمة ده واسع
يكفينا دي مش تركة .
و باكتب أي شيء وخلاص
تقول شاعر
تقول زجال
تقول ترزي
تقول بقال .. ولا بتفرق
مادام شعري ..
بيعجب ناس
بيلمس ناس
تحسه الناس
أنا موافق ولو قالوا
عليا ده البعيد .. زبال
ولو يتقال ..
ده شاعر نص ف المية
لا عنده خيال
ولا صورة بلاغية
ولو شتموني في المنشور
ولو قالوا ده متعلم ...
يدوب لسة بقالوا شهور
انا راضى كده بحالي .
مش احسن برضه ما اتعالى
ويركبني يا خلق غرور ؟
مادام عمري ..
ما ازعل ناس
ولا احرج ناس
ولا اجرح ناس
ولا منهم باكون ساخر
من الأخر فـ انا .. شاعر .
-----------
محمود السيد .