صوتك مخنوق ..
بتبص لفوق ..
رجلك وخداك علي بحر الشوق ..
سكران م الهوى و لا راضي تفوق ..
هتقضي الليل تشرب نيكوتين ؟
أوراقك و أقلامك شاهدين ..
قلبك محبوس ؟ ضيعت فلوس ؟
عايش في كابوس و بجد حزين ..
طفايتك ضاقت بعقابك ..
القهوة السادة علي المكتب ..
بتطول ليلك و عذابك ..
كوباية المية المليانة ..
إتكبت فوق ضهر كتابك ..
أشعارك صورك و جوابك ..
بتقصر عمرك و شبابك ..
ضوء الأباجورة المكسورة ..
ألبوم ناقص منه الصورة ..
و البنت إياها علي التليفون ..
عمالة بتلعب بيك كورة ..
و عقارب ساعتك ع الحيطه ..
عاملين دوشة و هيصه و زيطه ..
تنفخ دخان .. يملي الأركان ..
و يهز كيانك صوت الشيخ ..
لما يأدن علشان الفجر ..
فتحس بإنك قد الهجر ..
يا رب أنا إيه إللي حصللي ؟
فتقوم تتوضي عشان تنزل ..
علي أقرب جامع و تصلي ..
بقلم .. مصطفي تيسير