سامحينى مش ناقص مرض
أنا مش بضاعة بتنعرض
ولا سلعة بايره
فى المزاد
***
كان نفسى أكون لك
سندباد
وأملا خزاين مهجتك
فضة ودهب
لكنّى يا خسارة قوى
عمرى ما كنت السندباد
ولا كنت يوم
راجل غنى
***
أنا مش غبى
أنا كنت عارفك من زمان
عارف بإنك من ورق
توبك جميل
رحت أمسكه لقيتّه خرق
و لقيتنى بعشق فى القلق !
***
أيه يعنى حبّك
عاش فى قلبى
يجرحه مِيّه
ومرّه بيداويه؟!
أيه يعنى طيفك
عاش فى حلمى
وكل أملى
يحسّ بىَّ
وبين إيدىّ ألتقيه؟!
أيه يعنى عمرى بحاله ضاع ْ !
عشنا الضياع
فى حاجات كتيرة من زمن
فى العشق وهموم الوطن ْ
***
سامحينى مش هاقدر
أواصل رحلتى
مش هاقدر أرقص
فوق كرامتى ومهجتى
قلبى أدوسه بجذمتى
ومعبدك عندى خلاص
جانى الخلاص
لما حاولتى تضيّعى
صورتى كراجل
يومها كان الرد عاجل
كان زمان
دى غلطتى
إوعي تجينى ف سكّتى
سامحينى
مش ناقص مرض
أنا مش بضاعة بتنعرض
ولا سلعة بايره
فى المزاد!
********
شعر عاطف الجندي