البحر مش عايز يضحك
مع إني بضحك قدامه
يمكن ماهوش عارف يضحك
من جن ساكن في كمامه
يمكن ماهوش قادر يضحك
من اللي شافه في أحلامه
يمكن ماهوش فاكر يضحك
من كتر ضلمة أيامه
..........
البحر مش فاهم شبكه
بيداري في قسوة سمكه
ايه اللي حيفيده بعمقه
من بعد ماالكل يناموا
ياملح دايب في الميه
والكره باين في النيه
المر في الملح شويه
والغدر باين أختامه
..........
البحر مش فاهم حاله
سناره ضحكت لعياله
شيكت في كبده وأوصاله
جمعت وحرقت أصنامه
..........
البحر مش عايز يصفا
مع إني جاهز بالوصفه
حنقسم الحزن مناصفه
يديني حزنه واديله
فرحه تنشف منديله
وان عاز ضلوعي نوصي له
بالقلب والشوق خدامه
..........
البحر راجع من مالطه
والموجه مضروبه ببلطه
والخلطه مش هي الخلطه
السم باين أنيابه
والخطوه مش هي الخطوه
الحزن باين بالسطوه
والجرح مش جرح بمطوه
ناب اللي ناهش وكلابه
..........
البحر حارن بسكوته
مع ان جاهز نبوته
يقدر يغرّق بشروطه
ويعلق الكل في نابه
..........
البحر ميل ع السكه
فلقاني قاعد ع الدكه
غرقني بدموعه الفكه
والرمش طابق ع التاني
حطيت همومه في همومي
والدمع غرق لي هدومي
صحاني من غفلة نومي
غرقان وجاني ونجاني
.........
البحر نفسه مكسوره
اضحك له مش عايز صوره
اللعبه خلصت والفوره
شبعان ماهوش عايز تاني
خلصت ومغادر شطه
وكتب لي مش باين خطه
والجن والشعر يلطه
والشعر يشهر اسلامه
..........
البحر مش زعلان مني
ضحّكته مش فارق سني
كان نفسي والنعمه يغني
واسمع أنينه في أنغامه
..........
البحر مش ناقص خضه
عفريته جايه بتتوضا
بتعض ... طب هي العضه
والسنه نفذت في عضامه
..........
البحر أزرق متنيل
بتحايله ساعه وتتحيل
يحرن ولا أعيل عيل
ويمص دايمن في صباعه
طبطبت من حالته الصعبه
الجرح جامد ... مش لعبه
بصباعي وشبعت مداعبه
أتاريني بضغط اوجاعه
غدرت ومين كان مستني
هي الضوافر بتغني ؟
خانت وقالت ... بيخوني
من غير ولا حد يشوفها
..........
البحر مش مقمو ص مني
ضحّكته مش فارق سني
والنعمه كان نفسي يغني
كل الأغاني اللي عارفها
..........
البحر ميل وعصاني
مع إني واقف بحصاني
ريم المراكب وصاني
الموجه مش زي التانيه
الموج كمان له احزانه
وكتير بيسمع بودانه
صوت الحزاني اللي اتخانوا
والحزن بيفك التانيه
..........
البحر جذر واتمدد
وبدال مايضحك بيعدد
كل المسام اللي اتسدت
والضرب في الميت عاده
مين اللي فاكر أوصافي ؟
الحزن ظاهر أو خافي ؟
والهم نازل متعافي
مادا ومادا .. بيتمادا
سكينه غرزت بالنصله
والجرح في الجرح بوصله
والدم بين فاصله وفاصله
مالي الفواصل بذياده
روحت والهم في إيدي
يادي المراكب .. بتصيدي
والملح واصل لوريدي
بالمر في القهوه الساده
........................
م. عطية شواش