ياألف مليون خساره -- الشعر بقى سوق تجاره
والشاطر اللى بمهاره -- بيرص حبة كلام
وعنده فى الرص حرفه -- لكل قافيه فيه صرفه
والناس دى قاعده وعارفه-- ويسقفوا بانتظام
ياناس وليه المجامله؟ -- لناس ضعيفه وهامله
بين الخلايق دى عامله -- شعرا ومنها العلام
أنا روحت ندوة هلالى -- فيها الكافيه كان قبالى
والشاى لكن سعره غالى -- كأنه فندق تمام
إدفع وقبل اما تشرب -- والدفع مامنه مهرب
كأنه متجر وأغرب -- سويقه وبدون نظام
شعرا وعاملالى هيصه -- حازم وليلى ونفيسه
فى الندوه تبقى نقيصه -- الندوه مش للغرام
ستات وجايه عرايا -- مافيش فى بيتهم مرايا
ولا خوف لقرب النهايه -- دالعمر لحظه قوام
وعيون شبابنا جريئه -- بصاصه طبعا حقيقه
عينهم ماتبعد دقيقه -- النخوه منها انعدام
وناس تلقب دكاتره -- مفروض بقى تبقى شاطره
توزن وفى كل شطره -- نسمع نقول ياسلام
لكن الحقيقه اللى حاصل -- مالهومش فى الشعر واصل
ولسان كأنه مقاصل -- لحرفه مافى انسجام
ياشعرا ليه تقرفونى ؟-- تتسببوا فى جنونى
وتهيجولى شجونى -- ولاّدى حالة انفصام
الندوه لاهيّ قهوه -- ولا شاى وحلبه وقهوه
دى شعرا للشعر تهوى -- خلوها ساعة هيام
عاملين لى شعرا ولكن -- مالكوش مابيننا أماكن
طول مانت قاعد وراكن -- حتى ماتقبل علام
فى الشعر ياشعرا هيموا -- ذاكروا جديده وقديمه
خليك لحرفك نديمه -- رح تبقى شاعر تمام
.............
أحمد عبد الوهاب