كان ماشي لوحده في الضلمة
في طريق مهجور جوا الغابة
لاهو شايف يمشي ولا قادر
يستني تقوم تاكله ديابة
وبرغم الشوك والأمطار
وبرغم الخوف اللي في قلبه
وبرغم إنه خلاص منهار
مكتوبله يمشي علي دربه
كان لازم ينهي المشوار
قبل ما يطلع نور الشمس
قبل ما يفضح سره نهار
ماشي وماهوش طبعا شايف
كتر الضلمة مخليه خايف
كان متوقع حاجة ح تحصل
حاسس بيها لكن مش عارف
إصراره بينده جواه
لازم توصل لازم توصل
كان شايل حمل علي كتافه
والمتشال علي قلبه كان أتقل
وبرغم إن ماحدش شافه
كان حاسس بقلوب حواليه
بتقوله إستحمل كمل
واما الشوك
ملا رجله جراح
قرر إنه خلاص يرتاح
لمح السما فيها أول خيط
يعلن إنه الجاي صباح
حب يقوم ماقدرش يقاوم
حط جفونه مكانها وراح
حس إيدين وكتاف بتشيله
وسمع ناس واقفة تناديله
فجأة الندا قلبوه بنواح
المشوار كان آخره عياط
واللي يقول يا حول الله
سبحان الله
الراجل
ماااااااااااااااااات
...........
هشام الدشناوي