النهاردة....قصيدة للشاعر / مصطفى حسان

النهارده
زي ما تقولي كده
ضاع الكلام ..
كنت شايفك
رفة العود اللي هربت م المقام
كنت مستنيكي وسط الليل تعودي
كنت صالب بيكي عودي
كنت شايفك حاجه ممكن
تبقى أجدى من وجودي
كنت بحلم بيكي ورده
كنت شايفك
دمعتي بالليل في سجده
النهارده
حلمنا بيعدي بينا
كنا بنشبك إيدينا
كنتي حاضنه فيا خوفي
كنت حاضن فيكي ضلي
كنت انا ف حضنك بصلّي
قلبي درويش فيكي تايه
ضلّ قبلة وراح لقبلة
قبلة العاشق دليل
كنت انا في الليل وبنده
يا إلهي ترد قلبي
النهارده ..
النهارده ..