قواعد الدايرة السبع....للشاعر / مصطفى ابراهيم

قواعد الدايرة السبع" -
قاعدة (1) من قواعد الدايرة السبع :
أبعد نقطه بالنسبالك ..
جوا الدايرة .. هيا مكانك ..
ولأن أساسا ف الدايرة ..
هنا هو هناك ..
ف طبيعي تحس إنك عايش ..
باتنين جواك...

القاعدة (2) من قواعد الدايرة السبع :
كل أما تحس إن الصورة ..
مابقاش فيها مراكب سايرة ..
افتكر إنها أصلا كورة ..
وفي مسقط رأسي تبان دايرة ..
ف عشان كده لما بتتقفل ..
وتسد ف وشك مليون باب ..
من غير أسباب ...
ماتقولش الحظ اداني قفاه ..
وإنه طلع فالصو وألامونيا ..
الحظ يا عم اداك وشه ..
م الناحيه التانية من الدنيا...

القاعدة (3) من قواعد الدايرة السبع :
فرق السرعات جوه الدايرة ..
بينك وما بين كل الماشيين ..
هوا اللي حيقدر يضمنلك ..
إن انتا تقابل ناس تانيين...

القاعدة (4) من قواعد الدايرة السبع :
كل الطرق ف الكون ..
بتلف على واسع ..
ف مفيش نفر فاكر ..
إزاي رجع أو لف ..
شوف الإله حكمته ..
ف الدايرة عامله إزاي ..
و إزاي محجمنا ..
من غير ما يعمل سقف...

القاعدة (5) من قواعد الدايرة السبع :
إزاى تعرف ..
مين سابق مين جوه الدايرة ..
و من فيها قطع أطول مشوار ؟
مش ممكن برضه اللي في ضهرك ..
يطلع سابقك ..
وانت اللي حمار ؟

القاعدة (6) من قواعد الدايرة السبع :
الصدق الخالص .. خالص ..
والكدب المحبوك جدا ..
عمرك ما حتعرف تعرف ..
الفرق ما بين الاتنين ..
اتنين بيلفوا ف دايرة ..
واتقابلوا ف نفس النقطة ..
مع إن ف أول لقطة ..
كانوا ماشيين ف إتجاهين...

القاعدة (7) من قواعد الدايرة السبع :
ف الدايرة مافيش واحد بيتوه ..
غير اللي يقرر يوقف لف ..
ف اللفة مفيش واحد مجروح ..
إلا أما آخرها بتلقاه خف ..
ف خلاصة القول ..
عيش عرض وطول ..
وما تخفشي من الموت .. م الخرابيش ..
حتخاف و توقف لف .. تموت ..
حتراهن وتكمل .. حتعيش...