لو مشتاق ...كلمات الشاعر / رضا ابو الغيط

لو مشتاق لعينيا صحيح
كنت عشانها تسابق الريح
أصل كلام الحب مابينا
مش محتاج فيزا وتصريح

كنت تقولها برمش عينيك
ورمش عينيا يرد عليك
لا انا محتاج اسمعها اتقولها
ولا محتاج انا اقول شوبيك
حُبنا ساكن جوا قلوبنا
من صُغرنا وف حُبنا دوبنا
لا انا محتاج الناس يقولها
ولا محتاج لكلام يتعبنا
قولها ياروحى فين ما تكون
راح توصلنى فين ما اكون
اصل كلام الحب ما بينا
أقوى كتير من أى ظنون
قولها ما بينك وما بين نفسك
راح اسمعها يا روحى ف همسك
انت حبيبى وما فيش غيرك
يقدر كده ف الحب ينافسك
عمرى ما بسمع غير صوت قلبك
حتى ف بُعدك با أكون جنبك
لو مش سامع قلبى وصوته
يبقى الذنب يا روحى ده ذنبك
مهما الغربه مابينا تطول
مش محتاج لجواب او كول
قولها ما بينا ياروحى لروحك
وبلاش يبقى ما بينا عازول
............
كلمات / رضا ابو الغيط