وباتمني تنام عيني
واشوفك في المنام مرة
قوليلي يامة جاوبيني
سعيدة في الحياة برا؟
أكيد فرحانة في الجنة
أكيد ربي كتبهالك
وجازاكي كتير عنا
وأنهارها فرشهالك
وأشجارها زلفهالك
وريح المسك والعنبر
وخمرة شهد متكرر
وأهداكي الصبايا الحور
وأهدالك خدم وقصور
من المرمر وم البنور
ضلام القبر خلاه نور
وخلي جليسك القرءان
كما كان ليكي في الدنيا
هدية ربك المنان
عشان تقريه ف حياة تانية
في عيد الأم يا أمي
أنا مشتاق أبوس خدك
وابوس راسك وابوس عينك
وابوس رجلك وابوس يدك
واقولك يا اما سامحيني
أكيد قصرت في حقك
ومهما قولت أنا فيكي
ما حاقدر يوم أوفيكي
دا موتك كان علي عيني
وماقدرتش أكون جنبك
لكنك لما سبتيني
كتير غمضت في عنيا
واقول يمكن تزوريني
تجيني تسألي عليا
ياتاج راسي وحشتيني
وحشتيني ، وحشتيني
تعالي ف حلمي صحيني
وصحيلي الحياة فيا
..........
هشام الدشناوى