الجنيه المصرى مات
حقه نترحم عليه
كان لى وياه ذكريات
بس قبره مش لاقيه
صحا فى قلبى السكات
كنت اشيله يقولوا بيه
الف رحمه ونور عليه
.....
حتى كل العيله قبله
ماتو فى العهد القديم
سبقوه علشان يقابلوا
اب كان اسمه السليم
نص منه وربع راخر
والشلن قبل البريزه
بيها كات الناس تفاخر
عمله كات ع الجيب عزيزه
فاتحه منكوا ياناس اليه
الف رحمه ونور عليه
.....
جدى لما لقانى شاطر
وامتحنى فى الحساب
قام عزمنى ع القناطر
كنت طفل مش شباب
وعطانى منه واحد
قالى تتغدا كباب
روحت كلت شبعت خالص
خدت منه ربع باقى
النهارده ياحبايبى
بميه منه مش هلاقى
جيبى منه خلاص مافيه
الف رحمه ونور عليه
......
فى زمانهم كان له قيمه
كان بيدى الناس امان
دلوقتى قيمته بقت عديمه
وعند كل الشعب هان
والدولار ابن اللئيمه
ركبه لما لقاه جبان
عشره م الجنيه بواحد
الدولار فارد عليه
يادولار يابو قلب جاحد
مش اصول كنت تخاويه
الف رحمه ونور عليه
.......
الجنيه كان حاجه جامده
بس ده فى الخمسينات
من يشيله يبقى عمده
يمشى عايق وبثبات
الدهب منه تجيبه
والورق عنه يزيد
النهارده بيلعبوا به
عملوه معدن حديد
والعيال تلعب به رفا
والزمن ياما لسه فيه
بعد ماكان دمه خفه
هونت ياعم الجنيه
الف رحمه ونور عليه
................
احمد عبد الوهاب
ابن بيرم