فرفش حبه واسعد قلبك
خمسه لقلبك عشره لربك
لاغى حبايبك واظهر حبك
ايه رح تاخد م التكشيره
اسمع نكته وقولها لغيرك
ليه الحزن يبقى اسيرك
فرفش واضحك جدد سيرك
حلوه الضحكه لو كات عيره
اوعاك تمشى ضارب بوز
هنشوفك هنقول دا عجوز
الضحكه ياصديقى تجوز
للصحه طبعا دى ضروره
التكشيره تزيد فى هموم
تبعد عنك راحة النوم
لو مزنوق مافى حال بيدوم
افرد وشك نقى سريره
دنيا وزايله مهما تكون
كل الصعب ف يوم بيهون
ربك هيكون لك فى العون
وماتقلبش لمشكله سيره
ماضى وفات انساه عديه
اوعى تخزنه وتخليه
من ورا ضهرك يلا ارميه
كل ايامك تبقى منيره
ايه تاخد منها الاحزان
غير الحسره والتوهان
ليه على وشك حزن يبان
للمكتوب فى العمر مسيره
كدا رح تمشى وكدا رح تمشى
يبقى نفرفش ولا نندمشى
والاحزان لينا ماتلزمش
مابتفضلش العمر كبيره
لو موضوع تلاقيه هيضايق
بزكاء غيره بس دقايق
سيبه واتكلم بمزاج رايق
لو فى الحب بطل غيره
خلى القلب كبير ويساع
قول للكره امشى وداع
تبقى الضحكه نور وشراع
والبسمه للقلب سفيره
سك على احزانك سك
فكك م التكشيره دى فك
واعمل لها يااخينا بلوك
وادى للافراح تاشيره
..................
احمد عبد الوهاب
ابن بيرم