عاوزانى اغير
حاضر هاغير
طيب مانا اصلا باغير
ومفيش جديد ف الغيرة غير انى بقيت اعشق كتير
وكتير قوى
اكتر من اللى فى الهوى تستحملية
طب قولتى ايه
انى باغير من ضحكتك على شفتك على سنتك
حتى باغير على حبل صوتك م الصفير
وكمان باغير على خطوتك من شبر أرض بدون حصير
طيب تآمنى يا مؤمنه
إنى بغير على هدمتك لو حطتيها ع السرير
وباغير قوى م الضلة لو مشيت وراكى ...م الخيال
على كل حال
الغيرة كنز العاشقين
راسمال سهر كسب القمر من كل تجار الجمال
وباغير عليكى من عنيكى تبص ليه أصلا تشوفك ف المرايا
وانتى فى ساعة دلال
لو قلت لك انى باغير تلمس يمينك الشمال
هاتصدقى
وتصدقى انى باغير من أى طير
كروان بقى بلبل بقى عصفور بقى
ليكون ف باله يسمعك
برضو احتمال
الغيرة طبعى وانتى كائن مختلف
زى ماتقولى كده واو الجماعه فى اللغة
حرف الندا
حرف الألف
أنا باعتقد انك ملف وفيه تفاصيل النسا
سرى وللغاية قوى
وكمان باحس ان انتى زى التجربة
تركيبة من حبة صفات
كل اللى ماتوا م النسا كانول الفشل
وانتى اختراع
أحدث موديل. 2016.إناث
انتى الوحيدة اللى موافقه للقياس
انتى المقاس اللى علية يتوحموا
أو يحلموا ببعض الشبه
والبعض حلم عشان كتير
وعشان كده طبعا باغير
وباغير قوى من أى حاجة وأى شئ
من أى وهم
مابالك ابو حق وحقيق
لازم أغير انا اصلى برضك مختلف
ومفيش ف شعرى غير أنا وانتى
وفوتك ف القصيدة بألف خير
غيران عليكى م القصيدة وربنا
غيران ونفسى أغير الحرف الصغير
واقتل الحرف الكبير
طبعا باغير
..................
حمدي موسى