يادنيا لما تزهزهى
وتظهرى الوجه البهى
وتيجى لينا وتندهى
اكيد بتبقى مروحه
مدام فى يوم وجهك حلى
وتغنى موال تنجلى
اكيد ولازم ترحلى
فبلاش يادنيا الانزحه
جايبالنا توبك ننكسى
وبالنعيم تتونسى
ناويه لمين رح توكسى
تغريه وجايه مسرحه
دا توب غرورك ابعديه
تلبسيه او تخلعيه
عبدك يادنيا الخوف عليه
بتلفى زى المروحه
من امتى يادنيا الامان
ليه مفتحه كل البيبان
ياساكنه فى قلب الشيطان
احنا قلوبنا مصحصحه
ليكى عبيد مش من هنا
ولا هو واحد مننا
احنا رضينا بحظنا
والقلب عنك انتحى
روحى غرى ناسك والعبى
لكن هنا رح تتعبى
انا كل غايتى وماربى
اوفى فروضى مع الضحى
انا عبد للرب الكريم
عنده الجزاء عنده النعيم
ودا كله فى علمه القديم
حبك فى قلبى اتمحى
يادنيا سايبينك قوام
نسال كريم حسن الختام
ساعة ميعادنا بالتمام
بتمسى واللا مصبحه
يادنيا
...................
احمد عبد الوهاب
(ابن بيرم )