ورغم اني ...
بَحب أعيش حياتي بشكل عشوائي
بدون ترتيب ..
ولاَ عُمريش .. رسمت لدُنيتي خطة
باقول اهي ماشيه بالبركة
تصيب مرة .. ومرة تخيب .
ودايماً نيتي صافية
برغم ان الحياة صعبة
غريبة وماشية بالعافية
وطول الوقت بتقاوح
معايا تملّي ومعافرة .
ورغم دا كله متعود
َاصبر نَفسي واتجاهل
واقول قسمة يا واد ونصيب .
وباجي تملّي على نَفسي
واقول معلش ..
بكل براءة الأطفال
وقلب ابيض ما يعرف غش ..
وعمري ماكنت متلوّن
ولابس في الحياة ميت وش
اتاري الدنيا مش دنيا
وفيها الخلق قلاّبة
بيتعاملوا بدون رحمة
وفيها الكل يتغابه
بياكلوا فـ بعض وبينسوا
بإن الدنيا متسابه .
فـَ انا قرّرت اكون انسان
من الأخر واحد غيري
هاراجع نفسي واتغير
وهاعمل قرد بصديري
وهاتنطط على المخاليق
خلاص الطيبة مش نافعه
ولا عادت عليّا تليق
وهالعب بالتلات ورقات
ولو تسأل عن امبارح
هاقول كان ماضي عدى وفات
وقبل ما ايدي راح تديك
بإيدي التانية اقول لك هات
ما انا مضطر فـ الدنيا
اعيش وبكل لا مبالاه
هاقرب للي بيقرب
ومن يبعد هابيع وانساه
هاشيله من قاموس عمري
واخللّي القلب طوع أمري
ومش هاقبل يسوقني وراه
لأن الود كان بيسود
زمان الحب كان موجود
ودلوقتي البقاء .. لله .
____________
محمود السيد .