خلاص ما فيش باقي
و بإيه يفيد العتاب
ما أمنت بفراقي
علي إيه نلف ندور
قلبك دا عاش مغرور
إخرج بقي مـ الدور
بكفاية بقي تمثيل
قلوبنا مش تماثيل
و العشق بنا يدوب
زي السحابة ف ليل
و لا قولنا يوم مواويل
و لا دمع ف المناديل
ما عدش باقي بديل
لقلب بات مجروح
لساه بيبكي ينوح
قلبي سفينة نوح
قلبك كأنه طوفان
فرعون و مات غرقان
أنا قلبي مش ندمان
عيش وحدك الحرمان
قلبي ما لهوش مكان
مع قلب عاش غدار
ولعت فيا النار
و كنت ليك جنه
و كنت بير أسرار
أسهر و أتحنى
ليلك قلبته نهار
و كنت أتمنى
لو يكمل المشوار
بس الفراق دا قرار
كان حبي ليك أنهار
برج و خلاص إنهار
صح الرجال أسرار ؟
عملت سري مزار
للجاي و الرايح
زمنك خلاص رايح
و الغدر فيك فايح
أخرتها بفضايح
علي مسمع العشاق
إعلنها فـ الأسواق
إن إللي عاش سكران
من بعد غدرك فاق
و إن إللي شرب الشهد
من سم غدرك داق
فراق بقي بفراق
هصلي و أدعيلك
يزول ضلام ليلك
تفوق بقي م الوهم
و تقيد قناديلك
.....................
بقلم .. مصطفي تيسير