انا بعض نار.... لابتنطفى
ولاحتى ممكن توصفى
ازاى تكون
انا مش سكون
انا حد من عند الجنون
انا حد مش ممكن يكون
إلا انا ...إلا هو ...
إلا عشان الحب يبقى عملة سهلة
بدون ندم.... ولا يحزنون
انا مش هافرط ف الطريقة الموسوية للهوى
ولا عندى نية انى اكون
عاشق موافق للشروط
انا اخطبوط
وباحب اشخبط ع الحياة
وباحب الخبط ف الخيوط
اصل المشاعر مش صنم
وانا راعى من غير الغنم
بارعى الهوى
وبخاف على الأحلام تموت
فرعون مآمن متقى
شاعر انا مش منطقى
جوايا ألف حريقة من برد وسلام
واضح وضوح الشمس فى كبد السما
وباحب اقول الجملة من غير انما أو ربما
أنا مش بتاع الإحتمال
زلزال انا نفسى انتفض
وأرتب الناس من جديد
الثورة دينى ومذهبى
وباثور عليها بعد تحقيق المراد
الموج صديقى وتوأمى
البحر شارب من دمى
علشان كده فيه الرمق ومالوش كبير
البحر تربية ايدين الشعرطالع يشبهه
وانا والقصيدة والشيطان الشعرى
ملناش خط سير
مطرح ماترسى ندقها
مش ناقصة هيه اصلها
تفكير كتير
............
حمدي م