سلام مربع ياحكومه.....
سلام يا حلوه شمال ويمين....
ياشافطه رزقي بزلومه....
من شبرا مصر لراس التين.....
....
تملي قدري ف رجالتك....
يأكلوني أنا زبالتك....
ولو شكيت واللا سألتك.....
يسكنوني في الزنازين.....
....
يامكلبشاني بكلابيشك....
عشان مانيش من ألاضيشك.....
وعشان مانيش جندي ف جيشك.....
بتقولي عني من الخاينين....
....
مع إني جندي ف مصانعك....
وانا اللي خابزك وانا صانعك.....
وانا اللي ممنوع بموانعك.....
من إني اعيش علي أرضك زين... ..
كل المسالك ساداها......
وموقفالي النداهه.....
ومتاهه تحدف لمتاهه.....
مع إني شايلك جوه العين....
...
لا ف يوم بخالف ولا اعارض....
ولا حتي من بنكك قارض.....
وماليش نفوذ قاسي وفارض.....
ولا خدت من ملكك شبرين....
....
سلام من الغلب القاطن....
دهاليز حياة كل مواطن.....
فقير عشان بالآه راطن....
ولا عمره طاطي للظالمين.
......
أشرف البلتاجي