كنت قاعدة في الأتوبيس و كالعادة ساكته .. مش بحب أتكلم في الطريق إلا للضرورة أو أرد ع الموبايل.. أحب أتفرج ع الشارع و إللي فيه و أقرأ وجوه بعض الناس.. و طبعا أسمع كل ما يقال بجواري .. تقريبا.
المهم .. قعدت جانبي واحدة و حاولت أنها تدردش معايا.. ملقتش مني تجاوب فسكتت.
سمعتني أرد ع تليفون و بقول الآية الكريمة (و عسى أن تكرهوا شيئا و هو خير لكم) راحت متنهدة تنهيدة كانت هتطيرني من الشباك.
بصراحة .. فضولي أجبرني على معرفة السبب..قلت لها:
_ يا حفيظ يارب .. حصل مني شيئ ضايقك؟!
ردت عليها بتنهيدة تانية بس أقل حدة
_ كت مش ناوية أتكلم معاكي علشان أنتي صدتيني..بس الأية إللي قولتيها جات ع الجرح
الله يسامحه بقه
في نفسي قلت.. الله يساااامحه! ده الموضوع كبير بقه .. طبطبت على كتفها و قلت لها:
_ أنتي طيبة و ربنا هيعوضك خير علشان بتسامحي.
ردت و الدموع بتسح من عينها:
_ أنتي متعرفيش طعم الظلم و قهر المظلومين يا حاجة
بصيت لها بنص عين.. و ضحكت في سري
و سألتها:
_ مال الآية بالظلم؟!
_ كنت هتجوز واحد مناسب.. و حبيته أوي .. على إيده عرفت الدنيا و حاجات كانت ميتة فيا و صحاها .. و كنت مرة بكلمه و بكل صراحة.. ماهو الحب كده بنقول إللي ف القلب كله.
_ كملي
_ كنت معاه ف مشوار و حكيت له موقف حصل لي بكل سلامة نية و الله.. هو بقه جمعه على موقف تاني يشبهه في التصرف و لكن يختلف في الظرف.. و تناقشنا فيه.. و رجع كل واحد منا بيته. و ألاقيه مش بيتصل بيا زي الأول.. وحشني.. قلت اتصل بيه و أشوف ماله.. و بعد السؤال عن الأحوال .. لقيته بيقولي.. أن التصرف كذا و التصرف التاني .. خلوه يخاف مني.
_ يخاف إزاي يعني؟!! هو أنتي دراكولا؟
_ لااااا .. شكله خاف أني اتصرف كده و أنا على ذمته.. أصلي كنت بساعد ناس بفلوس و طمعوا فيا و حصلت مشكلة .. و ربنا وقف جنبي وده من أكتر من 3 سنين .. و من شهرين كمان سلفت واحدة صاحبتي و حبيبتي جدا مبلغ كبير شوية.. بدون وصل أمانة و غيره.. بثق فيها.
_ أها .. و بعدين؟!.. ماله هو بتصرفك المالي .. محاولش يناقشك و يتفهم الوضع؟
_ لا.. كنت بموت و أنا بشرح له.. علشان بحبه و عايزة أحافظ عليه.. و الغريب انه بيكلمني بهدوء.. و بيدعي ربنا يصبرني على فراقه.. و أنه كمان بيتحرق .. بس مش قادر يقنع نفسه.
تصدقي يا أختي.. أسبوع و أنا بعيط و بدعي ربنا يصبرني و يرضا هو عني .. لحد ما سمعتك بتقولي الآية.
_ أممممم .. صدق الله العظيم.
_ راجعت نفسي و شفت عيوبه الكثيرة و إللي هو عارفها كويس و كان بيحكيها لي.. و أنا أعديها
على رأي المثل... مراية الحب عامية.
بس تصدقي .. كنت بادعي ربي إني متجوزش راجل له علاقات محرمة.. ولا المدخن و لا البخيل .. ولا الأناني ...هههههه أتاري ربنا استجاب دعائي و أنا مش حاسة.. و فعلا.. "وعسى أن تكرهوا شيئا و هو خير لكم"
وصلت محطتي.. و كان لازم أنزل .. ودعتها.. قامت باستني.
..............
(سالمة المغربي)