مَنْدِيل ....... وَرَقْ..بقلم الشاعر الكبير / ناصر علي توفيق

قرَّب تعالى عِنْدِنَا
قرَّب وفرَّح قَلْبِنَا
إحنا هِنَا
بنبيع وَرَقْ
منديل وَرَقْ

بجنيه هَتَمْسَحْ دَمْعِتَكْ
وكمان هَاتِنْفَعْ آخرِتَكْ
مَعَ دُنْيِتَكْ
تمسح دموع
تمسح عرقْ
منديل ورقْ
امسح هموم كل السنين
رَطَّبْ جِبِيِنَك .. جَبْهِتَك
أوعاك تِدُور ويَّا الأنين
تِتُوه مَعَاهَا .. سِكِّتَك
دا انا دمِّى
سايل.. واتحرقْ
معجون باسفلت
الطرُقْ
عُمْرِي اتْسَرَقْ
عودى اتْسَلَقْ
مازِلْت أجِّدِف
فى العَرَقْ
وانا بأنصحك
يا مُبْتَلى
أوعاك تِسَّلِم بِالغَرَقْ
والوَرَقْ له فايدة
في كل الحياة
طول الدوام
مع منتهاه
اسمع يا بيه
منى الكلام
من غير ملام
ولا منظرة
أصل انت راجل
زوق وشيك
وأمير وحتة سُكَّره
بس انت كلَّك
من وَرَقْ
عقلك وَرَقْ
فكرك وَرَقْ
جسمك وَرَقْ
اسْمَك وَرَق
لِبْسَك وَرَقْ
حتى الجمال
اللي فـ عنيك
معجون وَرَقْ
كل النعيم
ما بين ايديك
برضك ورقْ
هاتقوللى ليه ؟؟
انا افهِّمك
خليك معايا حضرتك
هابدأ بلحظة مولدك
وبعد كل الترتيبات
التبريكات
وكمان مِلَبِّس والمُغَات
كتبولك اسمك
عـ الورق
وبعد حَبَّة مـ الأنين
بهجة وحنين
حبة سنين
بدأت رحلة كوَيِّسة
عـ المدرسة
شايل كتب
اقلام وَرَقْ
بالوَرَقْ شَقِّيت طَرِيقك
سِكِّتَك
فرحان.... حزين مع
دُنْيِتَك
مع رِحْلِتَك تِكْتِب ألامَك
عـ الوَرَقْ
تقرا فـ كتاب
تكتب جواب
حتى القصيدة
عـ الوَرَقْ
هَقُولَّك ايه ؟؟
واعيدلك ايه؟؟
أصلك يا بيه
معجون وَرَقْ
عيش الحياه
عـ الصعب دوس
أكْلَك يا بيه
خُبْز وغُمُوس
حتى الفلوس
صَبَحِت وَرَقْ
وفى النهاية
الحلم تاه
وبعد عمر طويل واه
بيكتبوا شهادة وفاه
فوق الورق
منديل ورق
قرَّب تعالى عِنْدِنَا
قرَّب وفرَّح قَلْبِنَا
إحنا هِنَا
بنبيع وَرَقْ
منديل وَرَقْ
منديل وَرَقْ
_______
ناصر على توفيق