عــمـــــرى مـــا اكــفـَـر ...بقلم الشاعر / ابو عمار المصري

جاية تانى ولا رايحة ؟
ولا ناسية السكة أصلاً ؟
ما البلاوى راقدة ..سايحة
فى الشوارع والنفوس
جاية ترضينى تواسينى
فى اللى كان النور لعينى ؟
ولا ناوية تـِنقـِطينى ؟
وانسى يوم ما جه ..شهيد ؟
واعمل اخرس واعمل اعمى
واهجر الأيام بحالها
ما افتكرشى حتى كلمة
وتقولى لى ..من جديد
إيه جديــد ؟
أنسى لون ريحة الرصاص ؟
وانسى طعمه فى الكفن ؟
وانسى حلمى بالخلاص ؟
وانسى عمرى اللى اندفن ؟
يوم ما جابوا لى الخبر
ضلعى اتخلع
قلبى اتفطر
أو هاسلم بالطبيعى
وارضى موت زهرة ربيعى
والغى عقلى واقول ...قـَدر
جايـّة تحيى الذكريات ؟
نفتـِـكـِـر بس اللى مات ؟
نبلع القهر ف حـِـشانا ؟
أو نمصمص فى الشفايف ؟
والسجون ساجنة السكات
والقيود زى المطر
يعنى هنغير واقعنا ؟
ولا بردو ..هى هى ؟
نجرى نهـتـِف فى الشوارع
نبكى ع الحق اللى ضايع
ولا نـِـرضى بأمر واقـِع ؟
كام سجين على كام ضحيـّة
إيه يا مصر آخرها ..قولى
وان سكتـّى ...بردو نازل
بردو بلدى
بردو حابك
لو سجـَنتى حتـّة منى
آااااه بحبك
لو فـِداكى أبويا وابنى
لو نكرتى حبى ليكى
وان عملتى بدمى سـِبـحـة
بردو اسبـَّـح لك عليها
وان عملتى بعضمى مدنة
والغراب فوق منها يـِدَّن
قلتى صــلـّى
بردو اصلى
مش هاقول.انا إيه
حصل لى
عمرى ما اكفر
ما الإيمان مولود معايا
راضـِــع الحب لترابـِك
راضـِـع العشق لعنيكى
سـِنـّى يكبر اشيخ
أعـَـجـِّـز
دمى بيضـُخ ف شبابـِك
كل يوم على رجلى بصمة
م الشوارع والرصيف
كل يوم احلم بكلمة
ناسى جوعى
ناسى هـمـّى
ناسى حلمى بالرغيف
عمر قلبى ما شالشى منك
فاكر انى ..حتـَّة منك
وارضى ذلى وقهرى فيكى
يا ما كنت ادعى عليكى
واكره اللى يقول آمين
إيه يا شيخة ؟
انتِ إيه ؟ ولا انتِ مين ؟
كنت اجى لك قلبى خاضـِع
واحضـُن الفجر اللى طالع
من سواقيكى القديمة
والغيطان
كنت اعادى ابن اللئيمة
والجبان
كنت .....كنت
ولسـَة كائـِن
عاشـِق الــ كان
والأماكـِن
عاشق الأحداث فى يومك
حتى ما افكرش الومك
قولى ..ردى اتكلمى
جاية فعلا ولا ناوية
تقتـلى حلمى اللى ساكن
جاية للميدان ...إمـــام ؟
والصلاة على أرض طاهرة
دمى فيها ميت علامة
شفت فيها ميت قيامة
دم إبنى فيها أطهـَر
ولا راح تتخـَلـّى عـنّـى
وتسيبى لى شطانى وافجـَر
يستبيح قلبى اللى حـبـِّك
يملا راسى بالكلام ؟
خايف افكــَّر
خوفى كله ...إنى اصدق
إنه يـِقـــدر
لو يكون واقـِع مـِسـَطـَّـر
بس بردو ..ساعتها راجع
صارر الأحزان فى بــؤجــــة
شايل الآاااه والمواجـِع
بردو نازل
لو مفيش سكـة رجوع
عمرى ما اكفر
بس خـَلـّى اللون فى توبك
لونـه منـّى
لونه حزنى ...لونه دمـّى
لـَوِّنـى بدم اللى راح
كل العلم
من ضلوعى
إعملى الصـارى لـِفـوق
يـِعـلى ..يـِعـلى قـَدّ مـدنة
لو يرفــرف حـُــر مــرّة
راح يخاف منه الغـُراب
إرفعى الأدان وصـَـلّى
حتى من غير الأدان
بردو صــلى
كـَبـَّـرى وبدون ركوع
بدون سجود ..وبدون إقامة
صلى على روحى الغريبة
صـــلاة جنـــازة
ساعتها ..هاضحك
إنى رايح وانتِ باقية
إنى فانى وانتِ باقية
دة اللى مكتوب والمـقـَدَّر
مهما يحـصـــل
عمرى ما اكفر

............
بــقــلــــــم ا لـــشــــــا عـــــــر
أ بـــــو عـــمـــــــا ر ا لـــمــــصـــــــر ى