قليل البخت..قصيدة للشاعر / جلال البحيرى

قليل البخت في الدنيا
يلاقي العشق ناقص بوح
و غاوي العشق لو صادف
يلاقي حبيبه طير مدبوح
يا سيما كل روادها
من المجاريح
و ليه الورد في المشهد
ف جوة ضريح
يا سيما المشهد الواحد
علي مهلك
ليه كل السكه ما تغرب
بترجعلك
قصاد الشاشه كام ميت
و جوه الكادر برضه الموت
ليه آخر بوسه بردانه
و آخر صوت
جيتارة كل اوتارها
من الشرايين
و غنوة كل الحانها
بكا مكتوم
لا ليل واحد ح يرضيني
كما الباقيين
و فرحه وحيده ما تسُرِّش
وجع بالكوم
يا ميت مدبوح و مدبوحه
تعالوا ف عز اوجاعنا
نبص لفوق
نلاقي حلمنا بيضحك
لكين مشنوق !