ما تحاول تُنكش فـ الماضي
وتقلّب فـ شوال الذكرى
سافر بخيالك لمبارح
واتخيل .. دي مجرد فكرة
قوم فُك قيودك واتحرر
ما تّعش فـ دور ان انت سجين
إضحك على روحك واوهمها
ان انت يادوبك ست سنين
غمض عينك .. وامشي بضهرك
وافضل إمشي ..
افضل إمشي ..
ولحد ما توصل باب بيتكم
فاكر بيتكم ؟؟
البيت الـ فـ آخر الحارة
إتفرج على نفسك وانت
واقف بتطير طيارة
واصحابك جنبك مـ الفرحة
بينادوا عليك وبصوت مسموع
وتعدي ساعات وانت بتجري
ولا حاسس لحظه انك عطشان
ولا حاسس وسطيهم بالجوع
ولا يوم حسيت انك قلقان
ولا حتى بتشكي انك موجوع
وفـ عز الصيف بتكون بردان
وبتلبس كت فـ عز البرد
ومع ذلك .. جسمك عرقان !!
قال يعني الواد كابتن ماجد
أو فاكر نفسه السوبر مان
عمّال تلعب ولآخر اليوم
ولحد ما يجي ميعاد النوم
والوقت برغم بأنه طويل
بتحس بأنه مابيكفيش
والنوم بيعَدي لكل الناس
وبيجي لحدك مايعديش
مش خايف يجي عليك بكرة
ولا شايل هم رغيف العيش
نفسك تكبر تطلع دكتور
أو حتى تكون ظابط فـ الجيش
أحلامك لسه يادوب خضرة
لكن قادرة ..
تاخدك وتطير ولأبعد حد
ولغاية بره حدود الكون
مضروبة حياتك طولها فـ عرض
بالبركة عايشها وزي ما تكون
مش فارقة يقولوا عليك عاقل
أو حتى يقولوا الواد مجنون
وفـ عز دا كله تقوم مخنوق
في ثواني تفوق ..
تلقاك خلصت بسرعة الحلم
فـ تقوم تترجى الليل يرجع
علشان ترجع .. من تاني تنام
وكمان تتمنى أنه يطوّل
وتعيد مع نفسك مـ الأول
رحلة بحثك ..
عن عيل تايه وسط الناس
يمكن تلاقيك .
............
محمود السيد