حبة سنين
متغربين
بين بكره و الخوف و الانين
و سؤال قديم قدم الازل
هو احنا من جوانا مين ؟
عيل عرف طعم الحياة
لما ابتدا حروف الكلام
و لا ولد لما اتسند
على طوله و اصحاب مش تمام
و لا احنا حبة شعر شاب
بيداروا فى قلوبنا الزمان
و شعور بيكدب كل يوم
و الناس تقول اكدب كمان
تتخفى جوانا الحاجات
و المحتاجات
ورا صمت خنقاه الف .. عيب
و خطاوى كانت ممكنة
ضاعت فى اوهام النصيب
و وجع عجيب
سابح فى شريان النفوس
بيسد ابواب حلم جى
ورا ليل بينزف صرخته
علشان نسى يوم يبقى ضى
و شبه ... و زى
يا سكوت على وشوش مجهدة
كان نفسها فى نظرة حنين
كما اى شرع و اى دين
ازاى نكون حبة سنين متغربين
و سؤال قديم قدم الازل
هو احنا من جوانا مين
.............
فهمى على