شفت الحقيقة ف عز المنام
أبويا يزورنى وبعد السلام
يقرب عليا ويمسك ايديا
وقاللى بتكبر وناقص علام
--
تقضى الفرايض وشغلك عبادة
حاسب ضميرك ونوم الوسادة
واياك توافق تكون المنافق
لظالم حبايبك وياخدك سنادة
--
وحاذر لجاهل قليل الدراية
يفبرك كلامك باشعار واية
تضيع القضية ف بق الهفية
وتهمد عزيمتك مابين الوشاية
--
وكامل مكمل قصير النظر
كتير الممارسة وعديم الاثر
بيقولوا فارس وللكلمة حارس
وشفناه يولول ف وقت الخطر
--
انا قلت يابا ف توب العناد
بروحى اواصل والم الولاد
بصرخة قوية وكلمة عفية
واخلى كلامى يقوله الجماد
--
فى بحر التسيب يتوه الشراع
وتلمح سفينتى فى لحظة ضياع
ابو العقل واعى يصاحب افاعى
وسارق بيسرق بلوى الدراع
--
برغم التخبط ومسح العقول
برغم التفاوت مابين الدخول
ايدينا الهزيلة هتصبح تقيلة
لضرب المهازل وقطع الديول
--......
طارق زيادة