شرايين القلب التعبانة
من كُـتر دخولك وخروجك
راح اغيّرها
واعمل عملية عشان خاطرك
واوسّع (شريانى التاجى )
علشان لما تعدّى براحتك
واعطـّـر روحى وازهـرّها
وح اقولك ايه ؟!
واكتبلك اية ؟!
دى مشاعرى وانت ف شرايينى
مش قادر حتى اصوّرها
.................
وح اسلّم مفاتيح ( صماماتى )
علشـــان لمّا تعدّى يومـاتى
ح تشوفى مشاعــر فرحانة
ومشاعـــر حبك سهــــرّها
ما هو اصل مافيش غيرك مالك
ولا قبلك حد استعمرها
والقلب خلاص اصبح مفروش
ولا باملكهوش
والنبض يغنى حروف اسمك
فافرح واقول له يكررها
............
القلب بكل ما فيه ليكى
وعايش بيكى
ومشاعرك علشان كده صادقة
مش ممكن ابداً اخسرها
ومشاعرى اللى اسيرة ف حبك
مش عاوز يعنى احررها !!
.....................
أحمد حسن عمر
أحمد حسن عمر