خاف م المادح
اللى بيمدح بكرا يذم
لو يتعكر مره الدم
أو يتصاب بشوية هم
بكل صراحه مايهموش
مايغركش كلام معسول
شكله الظاهر لك مقبول
ده حريف يلعب بالقول
جوا البحر حيتان وقروش
اللى بيمدح يتخاف منه
لو قدامك يضحك سنه
حرص قوى ياأخينا لأنه
دا ماهوش أهبل ولا طربوش
مايغركش كمان أحضانه
واستحسان ألفاظ بلسانه
أجدع منك قبلك خانه
فين الصاحب له ماخانوش
يعرف عنك برضه كتير
معلومه تعريك للغير
ساعة الذم هايبقى خبير
منه الكلمه زى شاكوش
خليك ناصح واخد حزرك
أحفظ قيمتك واحفظ قدرك
دى حقيقه كن ليها مدرك
قول على مدحه ده فنكوش
اللى بيمدح عنده الملكه
والموهبه وسريع الحركه
ممكن يطلع راجل بركه
وممكن يبقى هش فاشوش
خاف م المادح أيوه تخاف
كلمه باقولها للأنصاف
أتبرأ لخفى الألطاف
هايحوش عنك أي وحوش
قول له يارب ياعالم بيا
أغفرلى ذنوب متداريه
واكفينى من شر أذيه
واسترلى اللى مايعرفهوش
أملا الكف صحيح بتراب
أبدرها ف وجهه بحساب
زى ماقال النبى يااحباب
معنى حديث ماتنساهوش
..............
أحمد عبد الوهاب( ابن بيرم)