ما انا صابر بقالي سنين
باتشعبط علي اللقمة
واتمرمط عشان هدمة
واتغرب واشيل الطين
--------
وميت مرة وهاقولها كمان
عليا بكافة الايمان
لا انا سلفي ولا إخوان
ولا ليبرالي أو علماني
انا يا ناس يا دوب انسان
---------
ويوم ما وعيت علي الدنيا
وانا عاشق هوا الأوطان
عشانك انتي يا غالية
عشان رايتك تكون عالية
قطمت المر بالألوان
-------
وانا شبيت وانا حبيت
علي ارضك انا اتربيت
ولما كنتي تناديني
اسيب عمري اسيب البيت
واوهب دمي علشانك
وارسم حلمي رسمالك
ومهما كبرت مهما عليت
وفجأة ولما احتاجلك
فالجألك
تردي منين ؟؟
تقولي مفيش ؟؟
وغيري يعيش
ويتمطع ويتمتع
وانا مش لاقي كسرة عيش ؟؟
ولا حتي لاقي جبنة قريش ؟؟
---------
يرضيكي أعيش
ومتغرب؟ ؟؟
وعمري ع السكك يهرب ؟؟
واعيش في الغربة
مش داري
وسايب عزوتي وداري
عشان أدفع؟ ؟
ما انا دافع حياتي زمان
وزارع عمري في الأوطان
ورضيتلك أعيش متهان
وايه تاني يا ظالماني
لا حيلتي قيراط ولا فدان
---------
تقولي أصبر ؟؟؟؟
وبعد الصبر ما صبرته
وبعد الهم ما شيلته
وعمري ليكي سلمته
وعشت شريف
وأحاول امشي في دروبي
تفتشي جوة في جيوبي
مفهش حتي حق رغيف
------
وكيف أصبر ؟؟
وانا المدبوح لكرمالك
وانتي مبعترة مالك
علي الفاضي وع المليان
ولما ف يوم اقول مالك؟؟
الاقي الشر منك بأن ؟؟
--------
ازاي هاصبر علي الأوجاع ؟؟
وانا مش لاقي حق دواي
وابني يموت في يوم لو جاع ؟؟
مملكشي إلا بس دعاي
ومين يا ناس يبعلي الصبر؟؟
وياخد نص عمري ضمان
ورحت يا ناس أجيب الصبر
لاقيته قافل الدكان
------'
وبعد دا كله انا صابر
ومستني طلوع الفجر
ويمكن بكرة تتعدل
وتتبدل سنين القهر
ويمكن بكرة تتعدل
وتتبدل سنين القهر
-------
ناصر علي توفيق