وانتى قاعده ويا نفسك
حاسبى نفسك عاللى فيا
ليه تدوسى عاللى صانك
دا الكلاب دايما وفيه
لما باحلم فيكى بالقى
القى عمرى ضاع بلاش
لما باجى ادارى جرحى
بتقوليلى ماعدش شاش
لما بسأل يوم واقولك
ترفضى حتى النقاش
وتقوليلى دا اللى عندى
لسه حلمك ماستواش
طب وليه سايبانى وحدى
زى كورة الاسكواش
كل يوم أعرق وجلدى
م العرق ملح وباش
لسه ايه جوايا قولى
من جحيمك ماتناش
اقفلى ملف القضيه
وطلعينى عالمعاش
قولى كان طمعان بحته
قال ياخدها وبلاش
طبطبى ولمى الديابه
جوا حجرك كله عاش
ليه بتاخدى الصبح منى
تكسريه تحت المداس
والقى روحى جوا منى
زى بيت مالهوش اساس
والقى عمرى ضاع وعدا
واللى باقى يادوب طشاش
حاسبى نفسك واعقليها
شوفى ايه ضايع مجاش
شوفى مين ضيع حياته
والا مين واكل بلاش
لو صحيح عايزانى ارجع
بطلى شويه النتاش
واللى جاى عربون محبه
هدفعه لو حتى كاش
..........
اشرف الشناوى