أنا طفله صحيح لكن...
عمري معدي التلاتين
الشكل عجوز انما والله القلب شباب
لو جرب حظي ودق الباب
هايلاقي القلب بكرتونته
بيضخ الدم بكل حماس
بيحب الناس حتى اللي اذاه
ووتينه شديد والروح جواه
بتنط الحبل وتتشقلب
وكأنه جديد
وكأنه حديد
لا مآثر فيه لا جراح ولا نار
شايل ومحمل ومكمل
والتاجي بيشرب ف القهوه
والفرحه الماشيه بتتمايل
والضحكه الواصله لسابع جار
انا قلبي متين
وبيقنع روحه بان الطين
ماكياج السهره الصباحي
شايل احزان العمر البائد في الدواليب
وحيطان البيت المدهونه بصور الغايبين
ياللي انتوا مشيتوا وقولتوا خلاص انتوا مفارقين
في حاجات نسيتوها إزاي عمداً ؟
المج بايده المكسوره
برواز الصوره البهتانه
وريموت بيعاند ف ايديا
علشان الفيلم اللي ماشفتوش
الذكرى القاسيه السعرانه
ونجوم الليل السهرانه
وحاجات م النوع ده وماتعدوش
.........
ولاء عدنان