ماتتعشمش بزياده
عشان كالعاده هاتروح بخُف حُنين
ماتشبطشِ في ناس تانيين
وتِرجع تِشتِكي همك
مفيش في الدنيا غير وجعك
هايجري عليك وهايضُمك
مفيش في الدنيا غير أُمك
تحبك دون غرض واحد
والحب اكمنه مرض جاحد
ينهش في القلب ومايسيبهوش
والجرح مراكب دون مجداف
وعيونك بحر بدون مرسا
وساعات الليل أصوات خارسه
والوقت حزين
لو تفهم شرع البني آدمين
طيف مش بيبان
شبه البرفان مش بيدوموا
الواحد كُتر ما بيعاني
بينفض منهم في هدومه
إرمي سلامك
حبتين بُعد وغياب فوق كفهم
إزرع عتامه على الطريق
تطرح سواد فوق ضيهم
مانتاش يا صاحبي زيهم
كُف إشتياق
كُل اللي جاي
طمعان حقيقي ف مطرحك
هايمدوا إيدهم يسرقوا الحلو اللي فيك
ويسيبوا ليك
حُزن وحاجات هاتجرحك
وانت برضه ماشي سِكتهم غباء ؟
إفهم بقى
الناس عرايس عُرفهم
كُتر الزواق
فاضيين كما بالون هوا
مافيهومش حاجه تفرحك
........
ولاء عدنان