الذاكره
مش حاجه ما لهاش شكل
أو منظر
إن كان بقى النسيان رياح
بتهب من كل اتجاه
شايله العفار
والرمل والدخان
بتهب من كل اتجاه
وتسرق الألوان
من الصور والورد والمرايات
وتسرق السكر
من الغنا والشعر وعيون البنات
والسكة غابة حزن
فيها الحنين
عازف كمنجه عجوز
ايده اليمين فيها الكمنجه
والشمال عكاز
عكازه كان
ف الأصل مرود كحل
والذاكره
لها نفس شكل
مجرى الدموع ف وش فهد
مهمته
يطفى اللهيب اللى اشتعل ف القلب
بايد ولاد الكلب
دايما يقيدوا النار ف قلبك
ونفسهم يحولوه
قصريه م الفخار
وان جيت ف يوم
زرعت فيها أى حلم
لو شم ريحة نور
فورا
يموت
....
محمد علي عزب