وقال: علىٰ فكرة انا بحبِّك
وبَس خلاص
مَشىٰ وسابني وانا جُوَّايا ١٠٠ إحساس
وطاير قلبي مِ الفرحة
خلاص مفيش حروف جارحة
وصَحِّيت حِلمي من نومُه
وقلبي الصاحي بِهمُومُة
صَبَح نعسان
فِ حُضن الكلمة وعَبيرها
بيشرب من عسل نيلها
ونبض الروح رَجع يُرقُص
ورَقَّص عَجلة الأيام
تغُور الفُرقَة ومعاها وَجع وخِصام
ووَقَفِت ساعة الدنيا
وعَمَلت دايرة مِ الأفراح
خلاص فَجر السعادة لاح
وجَمَعِت ليلي مع فَجري
وشَمس نهاري مع قَمري
ولَضَمِت مِ النُّجوم تُوكَة
ومن نور القمر فُستان
وشَغلِت طَرحَة مَحبُوكَة
من الوَرد الِّلي كان نَعسان
وغَنِّت دُنيتي تاني
بلَحن وصوتُه ربَّاني
وبَس بكلمة قالهالي
بَحبِّك
رَجَعت لي الحياة تاني
.........
منى عبد الرحمن