باشوف الكف والفناجبن
والملم م الوجع فدادين
واجيب الماضي والحاضر
بخط العمر
واخلي الدنيا ضحكايه
وذات الوقت تشرب مر
واحوِّج بن م الاصلي
فيطلع غش يرقص لي
واكون الجاني والمدبوح
وابيع الروح
برخص ترابها للخاين
يمزَّع روحي ويعاين
مكان الجرح لما انهار
تغيب الشمس كل نهار
في ليل بيصبّ فيا مرار
عشان ملموس
يا فنجان الهوي المنحوس
كما حظي
ده خط العمر بيخطي على
الصادق
وبيفرَّق ثواني الحلم لو بشرى
اعيش بالقلب للذكرى
على الأيام
غريب يا قلبنا الطيب
بتبكي بعد كل سلام
ومين هيداوى ويطيِّب
حنين تايه كما الأيتام
وعادي دمعنا قريب
وعادي نعيش مع الأوهام
يا دنيا طباعها مش شكلي
بتضحك ظلم ف مشاكلي
وليه ف دموعي تضحك لي
وتسكت لما بسألها علي الفرحه
كاني عروسه في الدفنه
وواخده عزاها بالطرحه
خلاص خلصت مناديلي
دموعي وصف تفاصيلي
تناجي حلمها. المسلوب
لا انا قادرة اعيش عمري
ولا حزني ف مرة يتوب
كإن الجرح من بدرى
عاشقني وفيا دايب دوب
يا نواح الجراح قلبي
بقي ميت من الأحزان
وعايشه بذنب مش ذنبي
كاني غلطت ف العنوان
ولا لاقيه لنفسي وريد
ولا لاقيه لروحي امان
.........
هبه حسن