وبتعشم
في ضلة عمر راح مني
وكان شارب
شروق أحلامي من دمي
يصحى القلب كل صباح
على ريحة خبيز امي
ويتشوق لحضن الفرحة ف عنيها
وصحن الضحكة لما كان بيتفرق على الأحباب
وطعم الفرح شاي بحليب
وشوق داهن حطان بيتنا
كأنه حبيب بيجبر كسر أرواحنا
وبيصبر عطش ضحكتنا
لو حتى ببلة ريق
ورغم الضيق ف أحوالنا
يغذي النور قلوب الناس
ولا بنحتاس نلاقي صديق
يلملم عمرنا المهدور
وأمي تدور
تصر شقاها ف جيوبنا
وتوعدنا
ببكرة تروق
وبكرة يفوت
وبعده يفوت
تتاويني ليالي الغربة والأيام
تضخ ف عضمي قسوتها
وادوس على خطوتي لبكرة...
اللي مفروشة بكسر إزاز
والاقي سنيني وخداني
أعيش أحلامي بالعكاز
وتارس فوق ضلوعي وطن
وقافل روحي بالترباس
وترجع تاني تترجاني وتلومني؟!
كأن الذكرى ضل غريب
وطل عليا من لحظة فراق بتجوع
للمتنا
لا منها رجوع
ولا اتعشمت غير اني
أعود واجمع بقايا العمر
وادفنها ف حطان بيتنا
والملم من عيون الخلق
وش امي اللي كان بيحاجي ويساعنا
ومتفسر ف حلم حويط
لا منه اشتاقلنا وزارنا
ولا نسانا أوجاعنا.
.........
محمد الطنطاوي