يا عم الشعر سلفني
و لو بجنيه
باقولك ايه
مفيش لو حتى تلقيمه
اصب المعنى ف الفنجان
و انادي الحرف يسمعني
بقالي زمان
بحايل ع الحروف يعني
فاييجي الوحي يقطعني
ب ام البخل و التحويش
اجي له يمين يقولي مفيش
اجي له شمال فيلوي لي
ف بوز المعنى بالتطنيش
يا عم انجز
سطور الحب بتعجز
و انا واقفه له بتحايل
اراضي فيه
فيتمنع معاه مره
و تاني مره يتمايل
طب اتاخر
و خد لي سيلفي للذكرى
يجوز م القافيه اشرب لي
كاسين فكره
و اخبي سياقها من بكره
و الم حروفي و اتدارى
يجوز السطر يستهبل
و يعمل نفسه معرفنيش
.....
جهاد زيادة