مالِك بَقه
بتشِدِّي فِ عيون الحَنين تِترَجِّي فيِه
وتحَلِّفي ذِكرى الخيال تِتْحايلي بالساعة عَليه
مش قُلتي إنِّك تقدري
يامَا قولتلِك طب فَكري
بس انتِ حَدِّفتي الهَوىٰ بدموع وجَرح
وكَسرتي قلبِّك وَيَّا شُوق مِتعَبِّي فَرح
دلوقت بس الِّلي افتَكرتي
بتبُصِّي ليه لَمَّا المراية بتِندَهِك
وتشوفي صورتُه بين عيونِك تجرحِك
ونبض قلبِك لمَّا بينادي عَليه
بتحِسي ليه
طب لمَّا روحِك تُنغُزِك
علشان ماهيش لاقية النَّفَس
كُنتِ انتِ ليه تِتْخَيليه
علشان ماتِدِّيها النَّفَس
عُمرِك نَفَذ
عُمرِك ده إيه
من غير وجودُه...
لهفتِك.. بالدَّمع بتنادي عَليه
دلوقتي بس دموع عنيكِ اتجَرَّحِت
من غير بُكا شَق الخُدود
حَسيتي إيه مَعنىٰ الوُجود
من غير وجودُه يبقىٰ إيه مَعنىٰ الوجود
خلاص بَقىٰ
خليكِ عايشة فِ التابوت
صوتِك يموت
ماسمَعش مِنِّك مَرَّة إحساس يِشتِكي
ولاحتى كِلمة من شفايفِك تِتْبِكي
خَلاص بَقه
إتفككي
.....
منى عبد الرحمن