تحيا مصر؟ تحيا!!
بس تحيا ف أى ناحيه؟
تحيا كتكوت واللا داحيه ؟
واللا تحيا وسط غابه
وتكون أسد؟
أبنها ينادى هاتيلى تقوله خد
واللا يفضل واد صغير
تهدهده وتقوله سد
ننه نام ......خليك غلام
خليك بتزحف ليه تمد
عايز افهم بس قولوا
أزاى هاتحيا ؟
واحنا يم الشرق أو للغرب
أو فى أى ناحيه ؟
مصر تحيا
الحياه مش بالكلام ولا بالوعود
الحياه يعنى نشاط من غير جمود
الحياه دايما بعقل سليم وروح
وقلب خالى م الألم بدون جروح
الحياه مش عشه فوق ضهر السطوح
الحياه دى سباق وجرى
كأنه ضاحيه
ومصر تحيا
تحيا مصر والمكن شغال سنين
تحيا مصر بالأيدين الشقيانين
والنيل بيجرى يسقى ناسنا العطشانين
بابتسامه ف وجه أمى مش أنين
تحيا مصر بمدرسه وهمه وجامع
تحيا بس بقوه تقهر أى طامع
تحيا صوتها عالى بيرج المسامع
تحيا وغيطانها خضار
تحيا مليانه عمار
أمنها على كل دار
يطلع لها فجر النهار
ولا فيها برضه صاحيه
ساعتها بس
مصر تحيا
............
احمد عبد الوهاب ( ابن بيرم )