وَجَع قَلبى
وطُول لِيلى
وغُربَة بَعدَها غُربَة
بتسألنى عَنِ الأحباب
أقُول مَعرَفش
لَيه رَاحوا
وسَابوا القلب لِجرَاحُه
وفَاتُونِى بِدون أسبَاب
يسيل دَمعِى
عَلَى خَدِّى
ولا بِيهدَى ولا بِتِهدِى
ومش لاقى ياغُربَة جَوَاب
عَشَان خَاطرِى
بَلاش حِيرَة
كِفاية همُوم وتَكشِيرَة
وسَاعدِينى أرُدّ البَاب
بِتحيِى الجَرح
لِيه تانى
أنا مِن يُومِى وَحدَانِى
بَعانِى والهَوَى غَلاب
ومِتعوِّد
عَلى الغُربَة
بَلاقِى فيهَا مِيت صُحبة
بِتغنِينِى عَنِ الأصحاب
بَلاقى الليل
بيسمَعنِى
لا بيخُنِّى ولا يبعنِى
وَفِى مش زَىّ نَاس أغرَاب
و دَ كتابِى
و دَه قَلَمِى
و دَه شِعرِى اللى فَيه أَلَمِى
صَدِيق صادِق مَهوش كَدَّاب
ولو يقسَى
أنا بَنسَى
و بَصفَالُه كَده بِهَمسَة
ويوجَع قَلبى لَو يُوم غَاب
وَجَع قَلبى
وطُول لِيلى
وغُربَة بَعدَها غُربَة
بتسألنى عَنِ الأحباب
.........
حماده البهلوان