مش ح تجيبها البر معايا
مش ح تجيبها البر
كل ما انوى معاك ع الخير
تنوى معــايا الشر
............
بكره ح تندم على افكـــــارك
لـــو حبيت تخســـــرنى
وانا راح اكمّل كدا مشوارك
ولا فيش شىء يكسرنى
بقى معقولة شيطانك جرّك
وانت معاه تنجر
.............
مليون مرّة تعدّى عليا
وتسكت ما تسلمش
واقعد افهّم فيك واعاتبك
وانت ماتتعلمش
ليه بتعاند بس يا صاحبى
وايه خلاك تتغر
................
بقى معقوله ف لحظة تبيعنى
وكنت انا وانت أخوات
بعد ما كان قلبك مصــاحبنى
وكنت ف حضنى تبات
بعد ما كنت الضلّه ف شمسى
ونسمة ف عز الحر
................
مش راح تفــــرق تبعد عنّى
ولا تكون موجود
طول ما بتزرع شوك يألمنى
وانا باهديك بورود
مهما ح ترمى النخل ياصاحبى
برضه ح يدّى التمر
...........
لسه باحبك رغم عمايلك
اللى ملاها غرور
لسه القلب الطيّب شايلك
لسه بيدّى النور
رغم ان انت بتنكر خيرى
وتنفخ وسط الجمر
..................
أحمد حسن عمر