مشوارك بيقرب خطوه
والمشهد ضايع جوه سراب
اشتبكت كل خطوط السير
علامات التحذير بتلومني
وبترفض اي رجوع للخلف
أو حتى تفرمل للتأمين
الشكل كمين
ترخيص مسحوب
والذنب كبير
وملفك عمال بيكرش
والحمل تقيل
ومافيش تحويل
هتكمل وهتمشي المسافات
هيهات هيهات
عكاز الأحلام متكسر
والصبح ف كادرك متعثر
واهو شكلك غلبان متحسر
والشمس ف اخر باب مجهول
والركنه ماعادت ليها لزوم
طب نعمل زووم
واهي صوره بتحكي كتير حكايات
واهات وحاجات
وشيطان من وهم
يحقق ذات
و إيدين تتمد
وفيها ايات
ودموع مع حسره
وذنب اهو فات
رجعلي الكادر على التشريق
وانا اجيب الحصو وها أملي شوال
وهعد من السبعات سبعين
كل الشياطين
تستنى هناك
قرب لي الصوره بنفس الحجم
وانا ها ارمي شيطاني ف عز الرجم
انا شكلي خلاص عديت البيت
باستاذن وف دوري راح انزل
خلصت المشوار في المشهد
......
محمد إبراهيم