دا انت حقيقى فتوَّة بجد
ليه بتخزِّن مَيَّة ف سد
عايز النيل تاخده على حسابك
واحنا يادوب نشرب ع الكد
اصحى وشوف بتكلم مين
دا احنا ياواد المصريين
بُص لنفسك واصحى وفوق
نهر النيل دا تاريخ وحقوق
نهر النيل دا الموت وكرامة
نقطع إيد لو ليه تتمد
دا انت حقيقى بجد فتوة
عايز تحجز نيل بالقوة
بنفاوض ويَّاك وتماطل
عمر المصرى ما كان يوم عاطل
واصبر شوف كدا طولة بالنا
لمَّا حبالنا عليك تتشد
دا انت حقيقى فتوَّة بجد
ليه بتخزِّن مَيَّة ف سد
عايز النيل تاخده على حسابك
واحنا يادوب نشرب ع الكد
....
نهر النيل الموت وحياة
جايّة تبيع لبلادنا مياه
ليك الحصة بتاعتك بس
اوعى لمصر حقوق تتمس
شايف نفسك ليه كدا يعنى
بكره طموح شرَّك يتهد
شكرًا جارنا كتر خيرك
ليه باصص على مَيِّة غيرك
مين بيحرَّض فيك ويجرك
وهَم مطامعك دى هتضرك
بكره تحاسب ع المشاريب
حتى الكلمة عليك تتعد
دا انت حقيقى فتوَّة بجد
ليه بتخزِّن مَيَّة ف سد
عايز النيل تاخده على حسابك
واحنا يادوب نشرب ع الكد
....
ليه بتسد النهر الجارى
واحنا نموت من طفح مجارى
والغلطان لازم يتحاسب
لكن كله ف وقت مناسب
واللى يدوس على طرف لمصر
يبكى بدم دموع ع الخد
مصر تقول وتعيد وتحذَّر
عمر المصرى ف حقه ما هزَّر
مصر عظيمة تاريخ وريادة
شعب وشرطة وجيش وقيادة..
شوف بالخصم بنعمل إيه.
لو يتعدى ف يوم ع الحد
دا انت حقيقى فتوَّة بجد
ليه بتخزِّن مَيَّة فسد
عايز النيل تاخده على حسابك
واحنا يادوب نشرب ع الكد
......
راضي علي الطهطاوي