لما تيجى الشمس عندى ..
وابقى شاعر ويا فارس
لما اشوف أبريل ف مارس
لما باتجنن وامارس
أى حاجة مهيش تمام
لما باهذى واقول كلام
زى موج البحر مالح
لما باكدب ف المصالح
ولا أصالح... حد بدرى
لما باتعذب .. يا قدرى
من جنونى ومن ( بحبك )
لما باستنجد بربك
انه يغفر انه يصفح
كل مرة اغمض ألمح
وش زى البدر آية
كل مرة باقول حكاية
والبداية منك انتِ
كل مرة باقول يا بنتى
ليه ف عز الضلمة نورك .. بيساندنى
كل ما القى الكون عاندنى .. ب التيقكى
جنب منى .. لا ورايا .. لا ف دمى
لأ دى همى وأمنياتى .. لأ معايا .. لأ حياتى
جنب منها
ايه يا رب الشعر دينها .. ؟؟
مين هادينها .. ومين بحارب
مين هايقدر أو يقارب .. جنة فيها .. لون عنيها
وحده آية والف سر .. كل يوم هاكتب وأقر
انى متعفرت حروفى
انى متلخبط بشوفى
انى خوفى وانى جاهل
لما قولت الحب ساهل
لما عيشت الوهم حق
ايوة طبعا قصدى لأ
مش هابينلك خضوعى
أو دموعى لما اعيط
ابتديت ف الجرح أخيط
بس ناسى .. ان هذا الكون مآسى
ليه مقاسى .. باللى بيا ومن عذابى
ليه يا ست الجنة بابى .. بس حاجز
ليه يا معنى الكلمة عاجز
توصف اللى انا فيه ف سطورى
ليه بيبقى وبس دورى
انى اعافر .. انى اسافر جوَّه منى
لاجل يبقى المعنى واضح
ليه يا شطر الشعر فاضح
ليه شيطانك بيزاولنى
كل ما اكتب بيحايلنى
اوصف اللى انا فيه وبس
كل مرة باتوه ف نص
والتقينى لما اشوفك
كل مرة باقول يارب
بس لو تسمح ظروفك
كل مرة باقول يا حب
يطلع الحب ف حروفك
......
سيد مرسي