مش عارف اقولك ايه لكن
حبك لطلوع الروح ساكن
مش قادر أعشق يوم غيرك
بتقلب ع الجنبين وبأن
كل اما بتبعدى عنى بحن
وارجع واسلملك امرى
وتضيع فى هواكى سنين عمرى
واشيب وانا لسه صغير السن
بستغرب من هجرك ليا
وبتدى لغيرى الحنية
على عيبك غمضة عينية
واصبر نفسى واقول هتحن
وتحس بقيمتك وتقدر
ياما نمت وقلبك متكدر
من أفعال فعلا منها تجن
مش عارف اقولك وأفسر
من بعدك عنى انا متأثر
وشيطان الشوق عمال بيزن
وانا اقوله مصيرها هتتعدل
والحالة بحالها هتتبدل
يضحك ويقولى ده فى المشمش
وشك من كتر الشوق كرمش
ما هى دايما بيك ما بتهتمش
سيبالك هم ما يتلمش
لو توزنه يطلع مليون طن
لما افلس منه اقول سيبنى
فيه ناس بتهد وناس تبنى
انا مهما هواها هيتعبنى
هرجع واشتاق وادوب واحن
.........
عادل شوقي إبراهيم