لمي اللي فاضل م الوطن بشويش
جدر العفن نبت ف أوصاله
وماتستحيش من عمر نفسه يعيش
لحظة حنين طمعانه ف وصاله
وبلاش تلومي الأمنيات
أو عمر فات فيه العشم
لأمل ملغم بالشتات
أو حلم نفسه يكون سعيد
بصيلي مرة ولو هعيد واطرح سنين عمري اللي راح
ماتسبليش عين الوطن لو يوم شرب دم الصباح
الوعد كان من غير تمن
فبلاش تبوحي للكفن
وبلاش تكبي ف النواح
قلبي اللي جواكِ اندفن
وانا من بقايا اللي اتنسوا
فرشي الحصير
والزاد رغيف الذل من فضل الزمن
وسنين عجاف مترصصين
ماصين شقا الحلم اللي منداس بالخضوع
إيدي الشموع للعشمانين طلة رجوع
وش الغلابة اتشق من طول انتظار النور وبار
نازف مراره اللي اندهس
تحت الفلنكات والقضيب
واوعاكي تحكي إنه النصيب
كات خطوتك كل اما تيجي تمد أو توسع تضيق
كات جنتك نار للطغاه
والصبر جوه الجوف بيحبي وينكفي
أعمى الضمير
لكنه متحكم بسوط قاسي وضرير
نفس المصير
اللي استخبى ف قسوتك
دبح اللي باقي من الحنين
حبلى السنين الحلك
بدموع الغلابة الشقيانين
حتى السؤال اللي اتوأد
مين شق جوفه بدم مين
مستنيين
الشمس تطلع من قلوب اللي اختشوا
مستنيين
لحظة رجوعك تندهي
تفرح عيونك باللقا
وقلوبنا بتردد آمين
محمد الطنطاوي