باسند ملامحي على الزمن
خانتني أنياب الوجع
بين الحقيقه المستحيه ف قصتي
وعيون سعاد يمّ الهوى
شطين بيرسوا ف الطحين
وقت الحصاد ...
كان في معاد ع الغربه تقتل ف البعاد
وتناول الضحكه لقلوب
لسه بتتهجى الخطر ...
كان في أمل للشمس تشرق م الجبين
وتزيد حنين ويا الأنين
اللي ما عدى يوم على بالي وخطر ...
الله يسامح شعري من طول لهفته
سري انكشف ...
عشت السنين بتدارى ف حيطان الوجع
واما التقيت وسط الميدان
رايه وعلم
خبيت ملامحي وابتديت اعزف ورود
كانت حدود بتموت مابين
غُلب الحنين ...
كان الوطن حبة سنابل مُلهمين
بيناولوا ضي الشمس بوسه معطره
وبكف أشبه للسحاب
يسقوا الغلابه اللي اتمزع
توبهم حزين ...
وانا كنت عين
بتبات على باب الحياه تحضن قلوب
نارها الغياب
وسنين بتحلم بالوفا وسنين عذاب
بتعيش ف روحي مكتفه
كل الكلام ...
مأمور ترابك بالجفا
ليه حضنك الحاني اختفى
يامين يرجعلي الدفا
واتدارى ف حيطان الوجع ...
كان فيه ف أرضك يا وطن
عيل جدع ...
عشمت قلبي بالحلال مدّيت انا كفوفي
شط الهوى عدى ومال عديته من خوفي
ويا دنيا لو راضيه علينا بالهوان شوفي
كل الحبايب م الوجع والذنب مكتوبي
حظ القليب لما انكتب من طرفها توبي
وان كان نصيبك للعدم يا غربتي توبي
فاتت ليالينا ألم والدمع موصوفي ...
من بين عيونك يا هوى
ولا هوى صوتي
مالقيتش من قربك دوا
ولقيته ف سكوتي
كل الشوارع تنطفي
والدمع للذكرى انتباه
كل الحنين لابس سواد
مستني قلبي اللي انكسر ياخد عزاه
وانا كنت وحدي ...
إلا من سبحة أبويا اللي اعترف
إن الجدع ممكن يداري شكوته
ولا يلتفتش ف يوم وراه ..
يمكن أكون أشبه ل ضله وربما
كتفي اللي مايل كان صحيح شايل معاه ...
كانت علامات الطريق
مخطوفه من ضحك البنات
والشوق بيرسم لهفتي
لعيون تفارق عشها
وعيون هنا يمكن تبات ...
مشدود مابين طعم المرار
ف جيوب عبايتي وضلها
والليل غشيم خايف على حبة نجوم
بتنازع الحلم اللي باقي
وتنتشي بقسوه وعتاب ...
وانا كنت وحدي إلا من سبحة أبويا اللي انكسر
وقت اما راهن دمعه مني ف الغياب ..
مين يشتري قلب اتخدع عشرين خريف
مين يشتري
قلب اتوجع لكن عفيف
مين يشتري بالدمع غربه ف الوطن
مرهون على طعم الرغيف ...
هيا الليالي بين ضلوعي مقسمه
شقة ألم
شقة ندم
وغموس بيرسم بالعلم
صبره الكفيف ...
مين يشتري حتة جدع
كان الودع يشهد على طبعه الشريف
ويداوي صوتي اللي وقع ف العتمه مني
مالقيتوش ...
كل الوشوش اتبدلت
والباقي حبه م الرتوش
بتدوس ف طيبة قلبنا
وانا قولتلك وقت الوداع
ماتهزنيش .. يمكن أقع
ماتهزنيش .. يمكن أعيش
كل الشموع بتقيد هوى وبتنطفي
وانت اللي حالف تحيا وحدك ع الزمن
ولاتنطفيش
ماتهزنيش ..
آخر طيور الفرح بايته بين سناني
محزمه عود القرنفل
ف القليب
بجناح وريش ..
ماتهزنيش ..
أنا كنت أكبر نار بتاكل من غرورك
تنطفي ..
والشوق بيرسم مجدافين
عرض الحياه .
كان فين شراعك لما لاعبوني الغوازي
وقطعوا فيا الغجر
فتافيت تذاكر ..
حفله من صوت عندليب
( موعود معايا بالعذاب )
إيه اللي غاب ...
م الحسن في حضرت مماليك الربيع
وازاي يا غايب ترتضي ف الليل هواني
أشتريك
وتفوتني للتوهه .. أضيع
والدمع مني مايساويش
ماتهزنيش .. ماتهزنيش
بيني وبينك ف البعاد
حبة صور
بيني وبينك ف الصور
حبة بعاد
يا تخطي بحر الفُرقه
تاني تشدني
يا تفوتلي قلبي اللي انكوى
من قسوتك وقت العناد ...
انا كنت بسند يوم ملامحي على الزمن
خانتني أنياب الوجع
بين الحقيقه المستحيه ف قصتي
وعيون سعاد يم الهوى
شطين بيرسوا ف الطحين
وقت الحصاد
.................
محمود_يحيى