ارجعي لي بس ثانيه
لاجل ابوس رجلك و روحي
نادي علي الصوت عليا
ااصرخي فيا و بوحي
زعقيلي كتير و ماله
عاتبي فيا الليل بحاله
بس ثانيه ابوس ايديكي
ثانيه واحده ترد روحي
توبك المليان حنان
عقلي ده المليان جنان
لسه بيحسك ف توبك
لسه شامه الريحه فيه
لسه بتمرغ عليه
لسه حاسه فيه بحضنك
لسه ف المطبخ بشاور
ع البطاطس لما تتحمر بايدك
لسه بتنفس وريدك
لسه شايفه عنيكي فيا
لسه هي البسمه هي
لما بتحسي ف كلامي
انه متغير شويه
شايفه صورتك ع الحيطان
حتى لون عينك بشوفه
ف المزارع و الغيطان
لسه سامعه الصوت ف ودني
اللي عاوزك
بيتنا مفتوح للقرايب و الجيران
اوعي مرة ف يوم اشوفك
غير عزيزة
كوني دايما بنت غاليه
و مش رخيصه
لسه بتمسح في ريحتك
ف الهدوم
لسه رغم البعد طيفك
يمسح الضيم و الهموم
لسه سامعه صوت غناكي
و انتي بتغني له دايما
(يابو الطاقيه الشبيكه )
و انتي فرحانه ملاغيه
سامعه صوته بيلاغيكي
مين يا بطه أبو الطاقيه
تضحكي و تداري وشك
مين يا لول يا نور عينيا
شيلتي كل الهم عنا
كنتي ست بقلب راجل
شيلت انا بالاسم رسمك
قالوا عني كتير دي شبهك
خدت منك
طولة البال اللي قسمت ضهري بدري
و اتحنيت ف العمر مغرب
قبل ما يأذن لي فجري
بوسة الإيد اللي كانت فعل عادي
كنت ابوسها و اخبي منك وشي و اجري
بالدموع اليوم بنادي كف ايدك
بس كفي بعد منك ضهره محني
خطوتي لقبرك معاني
بس سايل مني فيض
بمشي على مهلي ل حدك
رجلي وصلت عند لحدك
فجأة مات الكل بعدك
حتي قلبي نسيته عندك
بعد منك و ببساطه
قلبي ساقط مني قيد
.........
جهاد زيادة